 | čálit  | | | | |  | | | Birger Nymo ii dohkket Sámeálbmot bellodaga ođđa stivrra ja áitá dikkin. | | |
SáB riidu ii leat nohkan
Sámeálbmot Bellodat doalai lávvordaga riikkačoahkkima Guovdageainnus ja válljii ođđa jođiheaddji. Riiddut gal eai leat dan dihte nohkan.
 NRK Sámi Radio: Heivehan Kjell Are Guttorm/Reportár Åse Pulk 19.03.2007 kl. 11:40
Sámeálbmot Bellodat doalai lávvordaga riikkačoahkkima Guovdageainnus ja válljii ođđa stivrra. Ođđa jođiheaddjin válljejuvvui Trond Are Anti. Muhto siskkáldas riiddut eai leat dan dihte gal nohkan. Sámeálbmot Bellodaga Birger Nymo lohká ain iežas SáB jođiheaddjin. Nymo lohkáge dál ahte ii lean Sámeálbmot Bellodat mii doalai mannan vahkkoloahpa riikkačoahkkima, muhto priváhta olbmot.
Riidalan guhkká
Sámeálbmot Bellodaga nággu álggii juo loahpas ođđajagimánus go Magga guđii liigeriikkačoahkkima masa lei gohččon. Čoahkkin jotkojuvvui, ja válljejedje Birger Nymo ođđa jođiheaddjin. Dan rájes leaba Magga ja Nymo nákkáhallan goabbá lea lobálaš jođiheaddji.
Nymo oaivvildage mannan vahkkoloahpa riikkačoahkkima lobiheapmen, danne go Magga ii lean jođiheaddji go bovdii dán riikkačoahkkimii. -Go Sárá Márjá Magga lea bovden liige jahkečoahkkimi, de ii lean son bellodaga jođiheaddji ja danin ii lean lobálaš gohččun čoahkimi, čilge Birger Nymo.
Dan čuoččuhusa gal ii ipmir son gii válljejuvvui ođđa jođiheaddjin riikkačoahkkimis, Trond Are Anti.
-Dát lea lobálaš čoahkkin, ja mon lean ovttajienalaččat váljjejuvvon jođiheaddjin, lohká Trond Are Anti, ja lohká ahte eai lea go guokte searvvi mas eai lean oasseváldit, Oslo ja Kárášjogas.
Hállat moivviid birra
Anti lohká áigut stivrras dál hupmat moivvi birra mii lea čuožžilan bellodagas. -Mii fertet stivrras dál árvvoštallat dán ášši, earret eará galgat go bálkestit sin eret bellodagas, lohká Anti.
Nymo ii loga diehtit dál maid dahket. - Sii eai sáhte goit dohkkehit dán mii lea dáhpáhuvvan, lohká Birger Nymo, muhto eai oro sáhttimin maidiige dahkat.
Áitá dikkin
Nymo lohká ahte ášši sáhttá diggái šaddat. - Jus galget sáhttit váldit badjelasas Sámeálbmot Bellodaga, de šaddet dikki bokte bálkestit sin, lohká Nŧmo, gii liikká ii jáhke sin nagodit dan dahkat.
Trond Are Anti gal ii bala deaivamis Birger Nymo dikkis.-Jos son hálida diggái áššái, de eat bala gal mii deaivvadeamis dikkis, go mis leat buhtes báhpárat, lohká Anti. |
