 | čálit  | | | | |  | | | Friddja rievssatbivdu Guovdageainnus nohká. Finnmárkoopmodat áigu ráddjet bivddu. (čájáhusgovva) | | |
Ráddjejit rievssatbivddu
Friddja rievssatbivdu Guovdageainnus nohká. Finnmárkoopmodat áigu ráddjet bivddu.
 NRK Sámi Radio: Heivehan: Kjell Are Guttorm Ann-Irene Buljo/Inger Elin Utsi 20.03.2007 kl. 06:51
Rievssatbivdu Guovdageainnus regulerejuvvo čakčii maŋŋel go mannan čavčča ledje nu olu bivdit. Finnmárkoopmodat áigu geahččalit ođđa ortnega vai bivdit háddjejuvvojit stuorát guovlluide. -Dán dahkat dakko bokte ahte ráddjet bivdogoarttaid, muitala meahccehoavda Rolf Kollstrøm.
Finnmárkoopmodat áigu maid mearridit lasihit hattiid bivdiide geat orrot olggobealde Finnmárkku. Sii evttohit doalahit seamma hattiid finnmárkulaččaide go ovddit bivdoáigodagas lei.
Guovtti guovllus
Dasa lassin go reivssatbivdu háddjejuvvo guovtti stuora guvlui, de galgá bivdu biilaluottaid lahká ráddjejuvvot. Mannan čavčča muitalii NRK ahte ledje nu ollu rievssatbivdit Guovdageainnus ahte sii vázze maŋŋálagaid meahcis. Dál galgá Finnmárkkuopmodat hádje bivdiid.
Maŋŋel go Finnmárkku opmodat otná stivračoahkkimis gieđedahalla meahccehoavddda árvalusa, de sáddejuvvo dat gulaskuddamii. Meahccehoavda lea maid árvlalan movt gáhttet loddenáli vátnajagiid ja dan dagašii dakko bokte ahte mearridit man galle rievssaha oažžu báhčit bivdokoartta nammii. -Maiddái dán ortnega áigot álggos geahččalit Guovdageainnus, ja de viididit dan eará guovlluide Finnmárkkus, lohká Rolf Kollstrøm.
Sihkarasttet dietnasa
Báikkálaš ealáhus lea leamaš balus massimis dietnasa jos rievssatbivdit eat oaččo bivdolobi. Dan dihte lohká ge meahccehoavda ahte sii áigot vuoruhit bivdokoarttaid bivdiide geat bohtet guhkkin ja geat ostet báikkálaš bálvalusaid.
|
