 | čálit  | | | | |  | | | Norgga Boazosápmelaččaid Riikkasearvvi jođiheaddji Nils Henrik Sara lohká vahát jos bohccobiergu ii leat vuorkkáin. | | |
-Ii šat bohccobiergu vuorkkáin
Bohccobiergovuorkkát Norggas leat juo guorranan. - In leat goassege ovdal vásihan ahte ná árrat guorrana, lohká Norsk KjøttRåvare márkanhoavda.
 NRK Sámi Radio: Kjell Are Guttorm/Åse Pulk 20.03.2007 kl. 08:53
Bohccobiergu lea nohkan buot vuorkkáin Norggas. - In leat goassege ovdal vásihan ahte ná árrat guorrana. Dat gal lea hui erenoamáš, lohká Norsk KjøttRåvare márkanhoavda Tom Rynning, gii ballá dán billistit bohccobiergomárkana.
Buorre johttu
Dán dálvvi lea bohccobiergu johtán hui bures, seammás go unnán lea njuvvojuvvon. Dat lea dagahan dan dili ahte bohccobiergovuorkkát leat juo guorranan Norggas. Rynning muitala ahte ovdal leat sii nagodan gokčat márkana gitta dassážii go ođđa njuovvanáigodat álgá, vaikko muhtin buktagat leat nohkan.
Njuovahateaiggáda Thor Aage Pedersen mielas lea sihke heittot ja buorre go vuorkkát leat guorranan. Son lohká buorren dan dáfus ahte eai báze čohkkát stuora vuorkkáiguin, nu go ovdal lea máŋgii dáhpáhuvvan. -Heittot lea ges dan dihte go sáhttá váttisin šaddat fas oažžut bohccobierggu stuora gávpeovttastusaide čakčat, lohká Pedersen.
Vahát guhkkit áigái
Rynning gal jáhkká ahte sáhttá dagahit bistevaš vahágiid bohccobiergomárkanii go vuorkkát guorranit ná árrat.
Rynning lohká váralažžan hárdit geavaheaddji ná, go álggos vuos márkanastá bohccobierggu ja hárjeha olbmuid dasa, ja de ii fáhkkestaga oaččo šat dan oastit. -Šaddá gelddolaš oaidnit maid geavaheaddji dál dahká, hilgu go bohccobierggu oalát, lohká Tom Rynning.
Thor Aage Pedersen gal ii jáhke dán billistit márkana. -Dat go bohccobiergu lea áigodatgálvu sáhttá dahkat bohccobierggu vel eanet eksklusiiva gálvun, jáhkká Pedersen.
Dan gal ii jáhke Rynning. Son lohká dálá geavaheaddji dakkárin gii háliida diehtit maid lea vejolaš oastit ja maid ii. Juste man stuora vahága guoros vuorkkát leat dahkan bohccobiergomárkanii, eai dieđe ovdal ođđa njuovvanáigodat álgá čakčamánu 1. beaivvi, lohká Rynning.
Rynning lohká fertet buoret plánet boahtte áigodahkii. Sus lea okta ávžžuhus boazodolliide. -Fertejit njuovvat eanet bohccuid, muđui šaddá importa.
Ballá importas
Norgga Boazosápmelaččaid Riikkasearvvi jođiheaddji Nils Henrik Sara lohká ahte váikkuhus guoros vuorkkáin sáhttá leat ahte bohccobiergu ii leat šat nu bivnnut go eai nagot buktit dan maid márkan dárbbaša.
-Lea váttis einnostit makkár vaikkuhus dás lea oanehis áiggis, muhto jos mii eat nagot buktit maid márkan dárbbaša, de sáhttá bilidit bohccobierggu gávppašeapmái, lohká Nils Henrik Sara.
Sara lohká váttis ráhkanit dán dillái, go lea šaddan nu bivnnut bohccobiergu, go bierggu jo meastta ovdal go dan lea njuovvan. Sara jáhkká ahte livččii sáhttán leat eanet biergu vuorkkás, jus njuovahatdilli livččii buoret.
-Njuovahat dilli ii leat vel doarvái buorre Norggas, ja dat buktá hástalusaid, lohká Nils Henrik Sara.
|
